3 IVF 準備GO!!!

上星期公司終於公佈要LAYOFF LAST DAY係下年2月14日! 其實都有心理準備不過始終有少少不捨! 好多同事都爭取INTERNAT TRANSFER, 但我真是不太積極, 原因是新工作真的很難容得了IVF! 我依家只想專心IVF! 上星期日唔知係唔係最近比較忙! 突然個肚脹食唔落野, 夜晚仲發燒! 星期一都冇返工繼續休息! 明天就係返QM見醫生的大日子!剛剛又發燒病完, 唔擔心就假既! 但一切都唔係我可以控制!唯有見步行步啦!祝我好運!

莫明的down

昨天下午開始好頭痛! 又收到朋友放完胎8-9日開始流啡! 其實真係唔知點安慰佢!!我個心都好替佢難過! 昨晚心情真係好down , 老公又出差, 自己一個食完飯返左屋企同3隻狗係梳化睇電視, 個頭就越來越痛! 個人有時又覺得好熱想出汗咁!係D藥既副作用定係我睇中醫針灸身體強左既結果, 我真係搞唔清!! 仲有2星期就返去見醫生, 個心突然覺得好亂好亂! 之前做過2次IVF其實我都唔係非常緊張! 今次噴左2個幾月藥, 又擔心D藥是否起到作用, 又驚反效果叫唔醒D卵…… 而且已經係公家第三次, 即公家LAST 一次......依D都係無形的壓力! 叫自己唔好諗, 又談何容易呀! DOWN左一晚, 11點半就去瞓! 好在一早起身已冇頭痛! 受到朋友C積極的感染, 我都要正面D! DOWN左一晚就由他去吧!! 之後要振作!!振作!!

我的工作

出黎做野12年多, 現在依份工做得最耐, 快8年啦! 早兩個月秘密地知道我們的部門要搬到深圳, 香港小部分亦會外判!LAYOFF可能事在必行, 心裡真的不是味兒! 但直到現在公司還未宣佈!我地估可能都係做到12月底! 剛好我12月底開始IVF! 正路黎講現在應該可以搵定工!但IVF……要考慮的實在太多!SO暫時亦沒有搵工! 一份8年的工作自然有一份感情!但早幾年一班好同事相繼走了!公司就好像剩下我一人!!!走亦都係遲早的事, 不過現在的公司確實有便於我IVF遲到早退, 請假, 經理都一一全收! 依個時間要搵份新工可以包容我做IVF是不可能的! 或者這一切冥冥之中自有安排……我亦無謂想太多! 前天再睇林醫師都有提到依件事, 佢叫我唔駛諗咁多, 其實我都話唔理住!佢話我人好, 自然運好!公司要搬走都可能留返一兩個, 都可能留返你, 而且大把人請!唔知係唔係真!ANYWAY都係準備我的IVF, 今晚又做YOGA!!

解開心結的中醫

有一位男性舊同事P, 同我都幾fd, 佢太太舊年發現子宮有瘤, 做左手術, 經朋友介紹睇林醫師, 今年初已懷孕, BB將係12月出世! P於是遊說我去睇林醫師, 因為我已睇太多醫師開頭都唔係好想去睇, 我話林醫師有咩咁利害, P話醫師唔只醫身仲醫心!佢覺得佢老婆睇完唔只人精神左, 而且仲開心左! 聽到咁勁於是諗都唔差在睇埋! 上到去林醫師診所, 已有6-7位係到等!等左1小時左右到我!醫師先同我把脈, 之後佢就講我心裡有D野仲嬲緊, 放唔低(當時係有D家事煩緊), 佢話我係一個外表隨和, 好多野都冇所謂, 但內裡硬頸OR固執的人, 係唔會理人講d野!都係照自己個套做!佢話做我朋友好好, 因為我對朋友冇要求. 但老公就慘啦!因為好高要求, 佢話我自己有自己既一套or固執, 但又唔夠自信, so係矛盾!! 但佢話我做得好事多, 有好多貴人!唔須要擔心!我之後同佢講我做IVF的事! 佢話個天其實對我好! 我話對我好點解做咁多次都未成功…….我又從來冇做咩壞事!講到我眼濕濕!之後醫師接住解釋, 個天係對你好, 如果之前比你既BB以你當時既心理身理, 懷孕其間已經可能嚴重抑鬱影響夫婦關係, 生出黎既BB唔係過度活躍就係自閉!SO個天唔比你住係對你好!個時聽完覺得幾有道理!解開我對個天的怨!佢叫我首先要放低心裡的結先!唔好難為自己!多D表達自己比多D信心自己!對老公要o爹D……. 之後當然有講我身體的問題, 佢話我難以入睡, 唔係深層睡眠, 瞓既時候有鼻塞但自己唔知, 都係腎虛, 瞓完都係攰, 下午3-6又特別眼瞓!開左10日中藥比我食! 林醫師講我既性格同身體都8-9成準! 普通中醫見得多, 醫埋心既就好少, 佢講D野都幾有哲理!如果可以做到佢講既野至少人生都會活得開心D! 噴左藥1個半月, 今個CYCLE已DAY33但沒有M到, 我估是正常的!姑娘本來話可能會有少少血!但暫時都未見有!身體都正常!但依然係攰, 都唔知係我本身體質係咁, 定係D藥負作用! 仲要噴多1個月就見醫生啦!

繼續努力

今個月8日已開始3個月既噴鼻! 每日4次, 最辛苦係早上6點個次, 醒左又未夠鐘起身! 又瞓過, 但又瞓得唔好!有幾次仲發惡夢!!! 我如常做針灸, 睇中醫! 上星期六day32 m仲未到! 去做針灸時醫師要我驗孕後先落針! 我見醫師前又已去清小便, 搞到冇尿痾!! 等左一陣自有, 等既過程又搞到自己有d緊張, 畢竟依次係ivf前last chance! 當然結果又係negative la! 下午去睇中醫前m小姐已經黎! 睇完等巴士返屋企時, 個肚勁痛, 又出冷汗!!!等左30mins先有車, 真係差d暈係巴士站! 上巴士時真係差d睇唔到d位, 因為真係就黎暈!! 好耐冇試過m到肚痛到出冷汗同暈!朋友話你唔係做針灸同睇中醫咩?點解仲會咁! 其實我都唔知針灸同中醫對我有幾大幫助, 但做左好似比多少少機會自己, 總算盡心盡力過! 今次痛得咁勁唯一唔同係開始左噴藥, 唔知係唔係d藥影響啦! 除左睇中醫做針灸, 我仲做多左少少運動, 一星期跑步2次or做鄭多燕! 星期日有時行下山! 昨晚仲去做返yoga, 係屋企附近真係又近又抵做! 不過隔左年幾兩年冇做, 真係覺得自己身體差左好多! 有d動作以前做到, 依家好似唔夠力做!!真係要好好練下先得!

向12月IVF進發

星期五一早去QM 今次係要照打水超聲波! 醫生想睇清楚子宮有冇其他問題, 為12月IVF準備! 醫生照左唔夠2MINS就話子宮冇問題, 內模都好平均! 其實咁短時間我有D懷疑有冇睇清楚架! BUT都要信佢架啦! 我同醫生講子宮冇問題, 咁即係卵質素問題啦! 如果唔係之前4次放胎都唔會唔成功啦! BUT醫生話好多因素影響WOO! 總之就係冇結論啦! 照完之後出去等時, 港大又做研究問我做唔做, 我見有時間就做啦! 今次研究係想CHECK你既體質同性格對IVF成功與否有冇影響! 體質由一個中醫幫我CHECK, 其實都係問D中醫問題, E.G.: 會唔會怕凍, 會唔會頭暈...... 之後有把脈同睇脷! 醫師話我係濕, BUT唔可以一味去濕, 我既濕係胃唔係既SIDE PRODUCT, SO要搞好個胃先!同埋要補腎, 因腎係主宰生育! 之後就係回答問卷睇性格! 之後出去等攞藥, 第一次既噴鼻TREATMENT, 一噴就3個月, 10月8日開始, 12月19日返QM 估唔到第三次IVF好快又開始!

奶奶的安慰

中秋節當日放早同老工先去北角做針灸, 之後一齊返奶奶到BBQ! 以前年輕時都幾鐘意依D一大班人的BBQ, 不過當個人大左我就漸漸開始唔想去! 加上佢地叫的朋友, 講真冇咩邊個啱傾, 老工又掛住招呼佢地, 又飲酒, 一去又要去到2-3點先走!! 所以就越來越唔想去參加!!! 但因是奶奶屋企搞, SO其實冇得唔去!! 當晚如我想像中一樣老公都係招呼朋友飲酒唱歌! 我就坐埋一邊燒野食!! 燒到咁上下老公的契媽問我地幾時生, 要生好快D生!! 奶奶都係到聽到於是佢係到幫我解圍!! 之後奶奶搵個機會同我講, 有D野唔好咁執著, 或者將佢放低! 佢地唔會因為我地冇BB而怪我地!佢話成日見我返黎都覺得我係唔開心!! 佢話好多人都冇小朋友一樣都OK, 只想我地開心D! 佢好佩服我做咁多TREATMENT!!! 佢之後又問我做TREATMENT既野, 我話佢知12月做第三次! 佢都話做埋12月就算啦! 我話如果唔得都可能去私家做, 佢話負擔到就試下! 同埋佢話佢直覺係覺得我有1個BB! 其實我都好明白奶奶係一心為我地好既! 但生活始終係要我地自己去面對! 話就話沒有小朋友唔緊要, 但佢地見到佢地個孫女(大伯個女), 咪又係開心到飛起!! 如果我地沒有小朋友老左, 始終都要我地自己面對孤獨!!! 同埋依家面對侄女, 就算沒有特別唔開心, 但內心酸痛的知味, 我想只有這裡的JM可以了解!!! 如果可以放下(放棄)坦白講亦不會在這裡寫BLOG, 亦不會花錢, 身心受盡傷痛!仍然再接受下次TREATMENT!!! 中秋節BBQ完後回家, 睡在床上哭了!!為剛失敗的TREATMENT, 為奶奶的安慰, 為自己一路走來的辛酸, 而暫未有所獲而哭!! 前路茫茫, 唯有盡能力去做!! 望上天賜一點緣份給我們!

突如其來的treatment

早一兩日係右邊加拿大摸到粒野, 於是打電話去鄧醫生到想睇下咩事! 講真有粒野都真係好驚下!! 個日可以6點幾見醫生, 放工去剛剛好, 唔駛成日請假! 去到等一陣就見, 真係好!!以前最少都要等個幾兩個鐘, 因為我應該係個日last 1個症啦! 一見到醫生, 佢唔係問我粒野, 反而問我之前係QM IVF既野, 於是我講佢知做左2次, 每次都有4個杯胎, BUT都未成功, 9月要打返去QM開始嘖鼻! 佢CHECK到我今日係DAY3, 就話我地不如再試下啦!! 其實我唔知係要點試!! 之後先去照左加拿大粒野, 佢話個胸無事, 加拿大粒野都唔會有問題, 應該係淋巴腺發淡! 醫生又介紹左個已退休既中醫師叫我打去約睇下可唔可以令個卵巢功能有改善! 醫生問我識唔識打針, 我話以前打過, BUT咁耐唔係好記得啦! 佢教我用針鎗打, 佢幫我打左50IU GONAL, 之後叫我自己打6日50IU. 就係咁個TREATMENT就開始左! TOTAL: $2300 DAY4: 一放工就趕返去打針 DAY5: 今日好忙好忙!一早去北角睇針灸, 係之前朋友介紹第一次睇. 醫師話我又虛又好火, 要柔左D火去! 希望幫我針幾個月準備12月IVF. 之後針左40MINS. 其實個醫師幾細心! 佢叫我老公下星期都黎睇佢!唔知老公黎唔黎! $380 之後趕去大圍, 係鄧醫生介紹的退休醫師, 講左自己的情況, 醫師話我個脈好弱!!冇力!!開左個藥方比我叫我去藥材鋪執, 之後叫我有時間煲下鴒湯飲!! $250 之後由大圍返東涌, 下午4點幾又出荃灣, 因為約左MATER同學去BBQ, 先返荃灣屋企攞阿媽幫我買的海鮮, 同埋順便打針!仲執埋中藥!阿媽又幫我買左2隻乳鴿! 去朋友屋企BBQ D藥就唯有雪係佢到!!好在將佢包好, 唔比人知係咩! 個晚落左兩次雨BUT都玩得好開心!! DAY6: 今日5點左右就打針啦!之後趕返奶奶到食飯!! DAY7: 繼續返工, 攞左D藥返公司, 係公司打針, 時間易預D DAY8: 係公司打 DAY9: 係公司打 DAY10: 下午返去見醫生, 照左有兩粒SIZE接近, BUT仲未得!要打多兩日50IU. $1100 DAY11: 今日朋友個B開刀出世, 真係好興奮!!! 放工前打埋針, 後工後攞左D針比返醫生 DAY12: 早上同埋老公去睇針灸, 估唔到佢都肯睇!真係好開心!!不過唔知佢KEEP唔KEEP到個個星期都去!!醫師叫我11點, 真係好難做!!!但都要一試! 之後我去返見鄧醫生照左1粒1.8, 1粒1.4左右, 都係唔夠大, 醫生要我今晚同明日打100IU. $1500 見完鄧醫生我上左港安探剛生完B的朋友, 係探既時候我地收到WHATS APP, 我地既另一位朋友係上海預產期本來9月21日點知都係昨天順試左!!冇諗同一班朋友有兩個同日生仔!!!真係好驚喜!! 之後坐車返奶奶到食飯, 係奶奶個超簡陋的廁所打針!!!真係好難頂!!BUT都要頂!!! 今日知到兩個朋友同日生左BB真係好開心! 但晚上去到奶奶到食飯, 見到我阿嫂個肚脹左, 應該係第二胎啦!!唔知點解個心實晒!!一種好落幕既感覺!!其實我之前都同自己講佢生得第一胎, 要第二胎容咩易呀!!!BUT睇到個刻個心真係好難受!我知我應該恭喜佢地, 我唔應該有依D反應. 但我實在控制不了自己!!!BUT當然都只限於心裡咁諗啦!表面對著他們還是要當作沒事發生啦!!依種心情真係好難受, 或許只有這裡的JM才會明白對人歡笑背人愁的心情, 去奶奶家食飯的次數又不能減, 那只好減我面對他們的時間!我7點左右到, 通常9點左右走! 以前間唔中都會約奶奶行街, 現在都唔會啦! 免得問及我既傷心事! 大家關係當然有點疏遠了! 我老公同佢阿哥感情好好, 坦白講大伯都係好人, 但係當我地想搬離上水, 搬去東涌近我阿媽時(最初依個IDEA其實係我老公提出, BUT一直未實行), 佢阿哥同我老公講做咩搬咁遠, 做咩搬近我阿媽, 冇人睇老爺奶奶! 老公受到壓力即時想唔搬!!坦白講個時樓都睇左, 已經想買!!而且已經比我阿爸媽知道要搬去東涌, 實在很難交待!同埋我都係一心諗住搬去東涌準備第一次IVF, 而且又係老公提出, 依家先黎話唔得!!冇可能囉!!因為大伯既說話, 我地鬧交鬧得好嚴重!後黎我更加決意要係東涌買樓!我地既關係當然仲係係谷底!!!時間過左同埋我肯作出少少讓步(依個讓步其實又係關我大伯事), 之後我地先冇事!! 世事既野有時真係好奇怪!!當日大伯話我地搬近我阿爸阿媽, 點知過左唔夠一年, 大伯佢地租左佢外父外母間屋住, 話就話租, 其實都係比佢地住! 大伯佢地好彩佢外父外母都係住上水, SO同我奶奶都唔遠!!但問心一句, 咪又係搬近外父外母!!!!點解自己就可以咁做, 細佬咁做就要加D說話!!!影響到我地!!!自己都做唔到既野點可以要求人地做呢!!!奶奶因為大伯租外父外母屋住好唔開心, 搵我老公傾過!!!以前如果我有D咩講到佢阿哥(其實都好少)佢一定係幫佢, 今次我講出我的不滿, 真係講到佢冇聲出!!!不過我地感情受損始終都係因為大伯, 想起個心都仲嬲, 好想學會放下, 但又談何容易!!! 另外之前提到既讓步, 其實姑仔早兩年拖欠10萬左右卡數, 話左比老公聽, 老公緊係話同佢大佬商量下先, 佢大佬話, 唔好幫佢住, 等佢知驚!點知過左2星期佢大佬幫佢個妹還左! 老公好嬲, 明明話唔幫佢住點知轉個頭自己又借錢比個妹!!!件事過左一OR兩年, 我都冇理亦唔想理!!!點知係買樓時, 老公提出要比10萬佢大佬, 當我地借10萬比佢個妹!!!總之佢講到佢大佬好慘等住個10萬!!我其實有200萬個唔想借!!!因為好大機會有借冇還!而且又係佢阿哥自把自為要借錢比佢鈿妹!點解佢唔承擔返個後果!!!但因為當時已同老公鬧得好薑, 不得不答應!!!但我有講明要佢每月還1OR 2千, 比時間佢慢慢還!!! 可惜過左1年有多, 我仲係1毫都未收過!!!唉!有時諗起都一肚氣!!!真係家家有本難念的經!!! 係依種關係上, 大嫂又有喜, 對我黎講真係又一打擊!! DAY13: 食LUNCH時問老公阿嫂係唔係有左, 佢話佢都係昨晚見佢肚脹左先知, 佢阿哥之前冇講過!佢話咁都係一好事(有第二胎)!!我知! BUT我心依然不是味兒! 或許男人係唔會明白我地既想法!亦沒有必要跟他計較! 下午跳左一陣鄭多燕, 之後老公踩單車陪我跑步!出一身汗!!!好爽! 晚上繼續打100IU 同埋按醫生分咐行埋! DAY14: 今朝去大好驚用力流晒D精出黎!但都冇辦法, 控制唔到! 都係個句, 要仲就好易仲, 唔得既好似我之前做咁多野都係唔得!! 11點打去問姑娘幾點見醫生, 好在係12:15, LUNCH前出去就得! 可以唔駛請假!!! 見醫生一照2粒卵原來有一粒已經排左! 仲有1粒1.8左右, 醫生即時幫我打左支黃體針, 之後比左兩支我返去叫出面醫生打! $1060 21/9可以驗孕 坦白講依種TREATMENT MAKE SURE D卵有排到, 我以前都試過, 其實我每個月NATURAL我幾乎都CHECK到有排卵! 但結果還是讓人失望的! 唔敢對依次TREATMENT有期望!但心低始終有一絲絲既希望!! 又要面對依種複雜的心情!!! 唯有既來之則安之啦!! 工作, 煮飯, 飲中藥, 做針灸, 睇醫師, 一切照舊!! DAY16: 本來約左吳醫師星期六, 佢話趕返廣州改今日放工6點9, but今朝7點幾又打黎話想早d!唯有約中午! Lunch time去大圍真係好趕!仲要落住雨, 真係好辛苦!! 醫師話我唔夠氣, 可以食d人蔘粉!! 講返上次fet last幾日我都check到得左, but最後都係唔得! 醫生話應該一定有著床, 先check到!! 我話我個時係噉m痛, 醫師話係宮縮, 排斥個胚胎! 開左10劑藥醫師詰係比較潤既藥! 之後3點趕返公司開會! 由星期一開始已盡量11點半瞓!! 希望一星期都有幾日做到啦! DAY17 5/9: 今日去打第二支黃體針 DAY19 7/9: 星期六, 一早又去北角做針灸, 老公都有去! 之後時間還早, 我去左鰂魚涌行街, 點知行錯方向去左炮台山, 再由炮台山行返鰂魚涌真係幾遠下!! 之後返上水食個tea就返奶奶到食飯, 走時我行先老公跟尾, 點知見到條青竹蛇仔!!!真係好驚, 嚇到我即刻行返轉頭!!! 今次的natural cycle, 又冇唔做粗重野, 又比野嚇到, 唉!!!結果其實都係睇上天的看顧!!! DAY20 8/9: 星期日一早起身整牛肋條, 煲藥等等!之後阿妹阿媽佢地又打黎話飲茶, 飲茶前要先去打針, 真係好趕下!因為星期日平時打開的葉醫生冇開, 好在今次醒星期一已去東涌地鐵站的診所問左星期日的醫生肯唔肯打!! 早上11點9去到等左兩個就到我幾快! 見到醫生順便問醫生打唔打ivf針, 醫生話打! 我同醫生講我上次又係星期日問左東涌所有診所都冇醫生打!!要走返去上水打!!醫生話ivf 針都好普遍, 應該冇問題! 其實我心諗上次我都有問依間診所, 姑娘唔駛1分鐘就話唔打, but當時唔知係唔係依個醫生!! Anyway佢親口話肯打!當做個backup啦!! 當然更希望唔駛再打已有阿b啦!!! 晚上食完飯去左睇激戰!!! 好睇! DAY21 9/9: 唔知係唔係昨晚瞓得麻麻!又搞到我中午有d暈暈地既感覺!! DAY25 13/9: 早兩日又因為姑仔還錢的事好勞氣!!!搞到我成肚氣!!有時真係想做人蠢D就好啦!!可以簡單D, 唔駛諗太多野!!不過總算定左還錢schedule, 但由10萬變左5萬, 另外5萬話還錢比親戚用左! 一想起就令人心煩!算啦!由他去吧!! 今日個人一起身頭暈暈!!有少少作嘔feel!!! 成個早上都好唔舒服!! DAY 27 15/9: 今早忍唔住用綠D CHECK, 結果白雪雪,又有 經前痛! DAY 28 16/9: 再CHECK都係沒有, 經前痛! DAY29 17/9: 再CHECK都係沒有, 其實都知道係唔得架啦!!不過個肚就係咁痛!!真係好辛苦! DAY30 18/9: M小姐始終都要黎!唔係極失望但始終都係有少少唔開心!! 之後CALL左QM 約左下星期五返去取藥嘖鼻3個月同照打水超聲波!

從新出發

從新出發! 希望有你伴行!!! 我係lovebaby!!!

搬家了

希望能與各網友keep contact!!

http://lovebaby33.blogspot.hk/

12月3rd IVF

時間飛快上次fet後已經過左1個月, 今日M小姐又黎探我!!

8月的暑假好似冇咩特別, 但又過得好快!!

有工返時間真係過得快, 放工又煮下飯, 其實日日都好似唔夠時間咁!!

上星期五去左QM見醫生, 約左3點半, 點知去到姑娘話佢地REORD係2點半以為我地唔黎, 醫生已經走左!

個時大驚, 唔係又要再約過呀!

不過姑娘話可以CALL返醫生黎!

等左一陣, 今次係一個未見過的女醫生, 佢話我有朱古力瘤今次用長方案要噴鼻3個月!

我話我應該冇朱古力瘤, 後來講左一輪先知內膜移位都係朱古力瘤的一種!

我後黎話我卵巢功能唔好WOO!用長方案會唔會唔好!!

醫生話佢地同教授開會決定用長方案, 之後又話佢要再問一問!

我地等左一陣, 佢返黎之後話我卵質素唔好, 佢地想我試長方案!!

我問醫生食阿士匹靈有冇用, 佢話阿士匹靈係FOR有慣性流產的人先有用!

SO我即係都係唔駛食!!

我再問醫生我會唔會係有積水問題, 佢話之前照冇發現依D問題!

但因有內膜移位佢叫我去照一次打水陰超, 再睇清楚D!

今次約左12月做IVF, 不過9月M到就要CALL佢地, 約照打水陰超同攞噴鼻藥!

其實我之前都估到會排到12月做!!BUT冇諗過係長方案!!

ANYWAY唔理咩方案都要努力!!剛好公司11月有個AUDIT, 希望12月可以輕鬆做IVF啦!

其實上次FET失敗後有同老公提過去深圳OR台灣做IVF, 不過比老公一口拒絕!

佢覺得完全信唔過!!連台灣佢都信唔過!

我考慮去依兩個地方有兩個原因, 第一當然係錢, 真係平好多!! BUT老公話如果真係唔夠錢, 情原將層樓加按, 去解決錢既問題!

我另一個原因想試深圳OR台灣係我覺得佢地用既方法比較多, 又CHECK比較多野! 對於我依D係抽到卵但放左4次8個胎都未成功既人, 好似CHECK多D, 試下唔同方法成功機會會多D!!

BUT ANYWAY 老公叫我唔駛諗, 佢唔讚成! 咁始終依D係兩個人既事我總不能自把自為!!

依家先專心準備12月QM 的IVF先啦!

FET Day 27-33

16/7 DAY 27 (放胎第12日): 經過昨晚的m痛feel, 個人真係冇咩心機!!

心裡知道又要迎接傷心的結果!!

可能之前已經不斷說服自己唔好有咩期望!!

雖然心如刀割, 但個人情緒上反而沒有太大波動!!!

下午都有感到子宮扯左1or2下, 之後又冇咩感覺!

晚上繼續薑水浸腳!

下午睇到blog友話如期估估下, 不如驗下啦!!

我之前咁多次放胎幾乎都冇咩提早驗過!!

都係見啡見紅先check!

因為真係好怕失敗的感覺!!

不過依家的情況反令我覺得blog友講得好啱!!

如期冇咩希望不如早d黎個了斷!!

得就固然好, 唔得從新開始, 半年後qm繼續ivf!

So決定明早day28 (放胎 13日) check一check.

17/7 DAY 28 (放胎第13日): 今早起身戰戰兢兢用綠d check, 因為家裡只有綠d!

其實心裡打定輸數, so今次check竟然冇手震!!

過左1min表面上睇唔到第二條線, 心裡都知道冇咩可能有奇蹟發生!!

不過都再等多一陣, 過多1min, 好似見到條好淺既second line, 但真係好淺色唔敢確定!!

屋企有好多綠d係買紅d送既! 之前一路都冇機會用黎check, 唔用都過期於是再用一條再check!!

都有好淺second line!!!

真係唔敢相信自己隻眼!!

成日覺得唔知係唔係真!! 唔知係唔係光線影響, or我眼花!!

So真係唔敢確定!!

本來諗住check完等自己死心, 點知依家仲疑惑!!

會唔會受藥物影響的假像? 但對上一次打針已係星期五, 距今4日有多藥力應該已過!!

心裡疑團一堆!!

不敢驚動老公, 因為始終未能確定, 免得一場歡喜一場空!!

現在唯有繼續上班, 一切如常!!

晚上 and 明早再驗啦!!

返工前再拜拜觀音, 如果是成功希望佢保佑胎兒健康成長, 賜我地健康快樂的小寶寶!!

如果唔係成功, 就希望觀音早日讓我知道, 早日重新開始!

當然成個人都係好忐忑不安!!

返工後個人成朝暈下暈下, 唔知點解, 可能係心理作用??

今日唔知點解痾左2次, 不過都唔係嚴重!

但就唔知食錯咩呢? 定係BBs既影響呢?!

個肚好脹下好似有左3-4個月!!

如果係真既就好啦!!

昨晚一返屋企再check, 過左5mins左右出現淺色第二條線!

同今朝差不多!

顏色又冇特別深到, so都係冇答案住!

晚上又開始有m  come feel, 個人好勊

繼續薑水浸腳! 唔知點解浸完覺得個肚舒服d!

11點左右就瞓, 點知瞓左好瞓唔到!!

我估到點幾兩點先瞓到!!

18/7 DAY 29 (放胎第14日): 一早6點又醒!!好似冇瞓過!!

7點左右用綠d再check, 又係過5mins左右出現淺色第二條線, 不過今次條線仲淺左小小色!!

究竟係咩事呢???

BBs你地要加油呀!!!我已經好比心機同你地一齊加油!!!

現在只能盡人事聽天意!!!

早上個人又係暈下暈下, 唔知係唔係瞓得唔好!!

又有m come feel, 斷斷續續!!!

晚上買左cleartube  digital check 出現1-2wk

But綠d 好淺, 淺到睇唔到!

So打定輸數!!

繼續薑水浸腳!

19/7 DAY 30 (放胎第15日): 今朝用綠d再check線粗左有1/2深色!

於是唔返工bed rest!

不過就係咁m痛, call左鄧醫生姑娘想驗孕, 點知佢地話要明天check先準!!

全日m痛不停!!

繼續薑水浸腳!

晚上臨瞓前, 突然覺得有野流出, 一check係淺粉啡血!!!

大驚!!即刻瞓!!!

20/7 DAY 31 (放胎第16日): 早上已心知不妙!!!

一去vv, 就痾左2個血塊出黎!! 一繼用綠d check, 都有淺線, 紅d都有線!!

不過一個早上血好似m黎第一日咁流!!!

之後個肚痛到要死!!!

問個天唔比bb我, 點解仲要咁樣折磨我!!!!

Book左去鄧醫生到check都冇去到!!

因為我知應該係m 黎左啦!!!

本來對grade5 雪胎都不敢存希望, 但check左咁多次都以為有機!!!

最後原來個天都係唔比我住!!!依種失望真係好大的折磨!!!

22/7 DAY 33 (放胎第18日): 返qm check, 係negative 約左8月返去見醫生

一切又要從頭開始!!!

FET Day 23-26 updated

DAY 23 (放胎第8日): 今早一切正常, 都係要返工!!

不過happy Friday 真係好開心!!

都係係食飯前又開始頭暈!!

真係奇怪!!

食飯時間時覺得個肚有D 扯, 個肚有少少陰陰痛!!!

但係好輕微!SO我都冇理佢啦!!

唔理啦!! 返埋今日!!可以休息2日!!!yeah!!!

我煲緊既步步驚心, 仲有兩集就睇完啦!!用左1星期煲完35集!!haha!!

下星期要開始勾野先得!!!

心情冇覺得好開心, 亦冇特別唔開心!!

但當然無形的擔心一定有啦!!!

因為晚上要煲劇都無時間想太多啦!

一睇完又要趕住瞓!!不過都係6點幾又醒左!!

相瞓多d都唔得!!!

放胎後第三日開始有陪老公去放狗, 我拖我隻最細粒既狗(迷你既狗), 行15mins左右, 我估都ok, 行少少等d血循環下!如果唔係真係成日唔係坐就係瞓!!!

放工去打埋最後一支加強黃體針!

晚上繼續薑水浸腳!

 

DAY 24 (放胎後第9日): 星期六同屋企人去飲茶, 又係到11點左右就有d頭暈!!

之後同阿爸阿媽阿妹行左一圈商場, 就返屋企休息下午2點幾食左一碗仔粥同菜!!

之後出沙田再去奶奶屋企食飯, 唔知點 解, 好似易左肚餓!!!未返到奶奶屋企已經覺得好肚餓!!

食完飯返到屋企11點幾又開始覺得肚餓!!!

不過屋企都冇咩啱食既野, so都冇食啦!!

晚上繼續薑水浸腳!

DAY 25 (放胎後第10日): 星期日老公病左, 其實上星期佢都係咁病, 之後好返d, 昨日又去踩單車, 曬一曬今日又病!!!有時真係好鬼激氣, 都唔好好保重照顧我, 反而係依個時候仲要我操心!!

全日係屋企勾野, 煲左粥比老工食, 我就上左樓上阿媽屋企食飯!!

今朝冇覺得頭暈, 不過子宮就好似有少少扯, 都唔知點形容!

又唔係經前痛, 但你又好似feel到佢有感覺比你!!

同埋依兩日分泌開始多左少少!!

依兩日都唔敢諗係得定唔得, 因為知道依兩日應該仲受加強黃體針既影響, 無論身體有咩變化都唔係真正的信息!!

晚上繼續薑水浸腳!

收到上次係qm碰到的舊同事whats app, 佢做iui, 不過佢放精1星期已感到m come feel.

其實唔知講d咩好!!!面對依d事真係唔知點安慰!!!

成功失敗好多時都係一線之差!!!只能說我很明白你的感受!!!

同埋默默支持!!!

DAY 26 (放胎後第11日): 今日星期一要返工啦!!如常返到公司!

早上分泌又多左dd, 不過就好似水咁!!

其實諗落同我平時cycle都差不多!! 但都係希望bbs已經默默來臨啦!!!

下午分泌一樣有, 好似一路有少少野流出咁!!!

依兩日有時左邊胸會覺得戚戚下!!!

下午個人有d暈下暈下咁!!有時有想嘔, 不過嘔唔出, 有輕微作M到FEEL!

離上次打針越耐, 心中的恐懼就日增, 不境結果很快就會知道!!!

每日都拜觀音講既都係希望觀音送子女比我地!!

希望佢可以成全我地!!成全所有等B的媽媽!!

P.S. 放工開始感到強列m到feel!
真係食飯都冇心機, 老公問咩事, 我話肚痛! 佢話係唔係食錯野, 我話唔係!!!
佢叫我睇醫生, 我話冇得睇!
就係咁之後大家都冇提!!!
晚上如常睇電視, 今晚好早就瞓11:30,
可能作m痛個人已經好勊!!!
沒有哭泣, 沒有發脾氣, 沒有傾訢!!!
心裡有的只是恐懼!!!

FET DAY 19-22

DAY19: 過完星期六日, 又開始返工啦!!

    Lunch前食左隻蛋, 之後就覺得個胃成日頂住頂住!!

    放工前去廁所發現好多乳白帶好淺好淺啡分泌!!

    心諗唔通係著床既影響, 定係黃體針既影響?!

    轉個頭又擔心咁多分泌會唔會將BBs 沖走架?!

    定一定神叫自己唔好想太多lu!!

    放工前又同老細講左我下星期唔想去廣州出差, 叫老細代我去!!

    我話真係唔好意思, 佢話唔緊要!

    之後仲問我係唔係成功左!!我話未知住!!

    其實老細都算唔話得, 真係感激!!!

    講完成個人鬆左!!!

    因為唔想太辛苦, 我依段時間都封爐!!

    一係就去阿媽屋企食, 如果阿媽冇煮就唯有出街食!!

    昨日阿媽唔係東涌屋企, 我買左個鴻福堂, 花膠湯!!

    雖然個肚脹, 但都叫自己要飲, 個湯都ok好飲!!

    晚上就繼續薑水浸腳!!

DAY20: 早上個肚都係好頂住, 但當然都要食早餐啦! 依家每日都最少1蛋!

食飯前有少少M到FEEL, 但唔係肚痛, 係身體覺得寒一寒, 起晒雞皮!!

過一陣間又冇野!!BUT就有少少頭暈!! Anyway我平時唔會咁早有m到 feel!!

唔知係唔係身體弱, SO有依D反應!

不過依家都唔理得咁多啦!

BBs希望你地係我肚裡乖乖長大啦!!

我辛苦d唔緊要架!!!

放工即返東涌打第二支黃體針!

晚上就繼續薑水浸腳!!

同煲劇最近睇緊步步驚心!!

依晚都幾夜瞓成點幾先瞓!!

DAY21 (放胎後第6日): 其實依兩日一早6點幾就醒, 我平時好少失眠, 通常一瞓就唔駛5min就瞓著, 雖然依家我都係好快瞓著, 不過6點幾醒就好少, 我平時7點幾8點先起身!

我依家生活係好正常亦唔係太過緊張!!不過可能自己潛意識入面始終都係緊張! So影響睡眠啦!!

今早個肚都有少少脹, 又係食飯前覺得頭暈, 唔知係唔係瞓唔夠影響, 今晚都係早少少瞓啦!!
雖然想早瞓不過都要成點先瞓!!

晚上就繼續薑水浸腳!!

DAY22 (放胎後第7日): 唔知點解一到lunch前我就有d頭暈feel, 唔通係心理作用!!!
個人個肚都冇咩特別感覺!!冇感覺又係會令人有d擔心!!!!
唉!!!算啦!!比我亂諗5mins啦!!!
下午食完lunch, 突然肚痛, 痾左2次, 好在依家好d!!
我腸胃平時ok架唔知點解今日會咁!!!
希望冇影響我既bb啦!!!
BBs希望你地都一齊努力啦!!
媽媽好想9個半月後見你地架!!!

FET 放胎 day16-18

DAY 16: 一早就坐的士去QM, 去到QM同老公食早餐, 其實可以唔駛咁早坐的士去到!不過老公同我去完醫院佢要趕住返大陸睇廠! 所以我地就咁早去到!!

食完早餐老公就走左! 我上左K5N, 姑娘比左單我, 我當然就去左交錢先啦!! 之後返上K5N 等姑娘帶我去K5S間房等!!姑娘話我地要11點左右放, 我姑都要好遲下!!

中間就飲水, 去廁所, 飲水去廁所!

到11點半姑娘黎話我地要等到12點幾啦!如果有飯黎就食左先!!

於我又去左廁所, 之後又飲左半杯水, 轉個頭又有飯黎, 緊係食埋先啦!!

一食完飯就到我啦!!其實講真放胎, 係冇咩好緊張!!

不過個時我係一D都唔係好急!!!冇計啦!都要照去放!!

12:30左右到我放, 入到手術室, 姑娘話我兩個胚胎解凍都冇問題!!

姑娘開始用掃瞄器係肚到照子宮位, 可惜照黎照去都睇唔清, 因為膀胱唔夠FULL……

今次真係老貓燒鬚, 不過佢地應該用條喉做左幾次TEST, 之後都照放, 姑娘話條喉好順. 應該放左冇問題, 不過係個MON到就睇唔到!!

不過姑娘都不斷用掃瞄器係個肚照, 最後就見到兩粒閃閃啦!!係陪養液包住胚胎!!

於是佢地再CONFTIM導管有冇遺漏胚胎!當然係冇啦!!

於是有驚無險地完成今次放胎!!

休息左個幾鍾後, 細妹黎接我出院!!

返到屋企當然係瞓覺啦!!一早5點幾起身, 到3點幾先返到屋企!!

我唔瞓BBs都要瞓啦!!咁佢地先可以快高長大啦!哈哈哈!!

雖然係grade5 BBs, 不過都希望佢地盡力啦!!加油呀!!!

媽媽會同你地一齊加油架!!

今次qm都係冇開加強黃體針!! 於是call左鄧醫生的姑娘講左情況! 轉頸佢打黎話叫我去攞藥明天開始打!!
阿妹送左我返屋企後, 就幫我出荃灣取藥!

晚上上左樓上阿媽屋企食飯, 又叫阿媽煲薑水比我浸腳!

今次放胎入去k5s等時, 其實見到兩個私家症及另一個公家症, 加埋我4個!!

其中一個私家症操有口音廣東話, 唔知佢係唔係大陸黎hk做ivf!

同佢講左兩句, 原來依家QM私家症都要8萬啦!! Wa!真係拍得住私家啦!!

講真都係差兩萬, 咁去私家好過啦!!

另外又同公家個位傾左一陣, 佢原來等一次ivf放胎, 問佢係咩問題, 佢話係佢老公d精有問題, 不過佢only抽左4粒卵, 得3粒ok, 做埋isic 得1個胚胎ok!

我個時心裡諗佢本身可能都有問題, 如果唔係點會得4個卵! 但我冇講到!有時真係知少d好過知多d!!  我見佢都好樂觀仲叫我唔好緊張! 不過佢自己又好緊張!  Anyway希望我地都可以成功啦!!

DAY 17 : 今日係星期六 老公WHATS APP左奶奶話今個星期唔返去食飯! GOOD!可以唔駛走黎走去!!

今日全日係屋企, 除左上阿媽到食飯!下午係屋企睇左阿凡達!!隻碟係屋企成年我都未睇過!! 於是兩公婆係到煲碟!!
到4點半左右就去左樓下診所打加強黃體針!!

晚上繼續浸薑水,  身體冇咩異樣!

其實只係由DAY12左右至今日都係乳頭好敏感!

DAY 18: 一早去屋企附近茶樓同阿爸阿媽飲茶! 之後返左屋企煲劇同勾野!! 下午老公出左去採單車, 晚飯就去左樓下食, 因為阿媽入左天水圍探親戚冇人煮!

晚上繼續浸薑水,  身體冇咩異樣! 乳頭的敏感亦都退左!

每日都會同BBs講你地要加油!!

第四次放胎開始

DAY 10: 剛好day10係3日假期的第一日, 即係話3日假期都要返去抽血!

都好既假期抽好似冇咁辛苦, 唔駛抽完仲要返工!

不過當然都係好早起身去QM, 6點幾起身去到QM8點左右入到K5N坐無虛席!!

等左大半小時到我, 先入去簽文件, 我問姑娘係放胎前有冇得照超聲波, 佢問我照黎做咩, 我話睇下內膜夠唔夠等等, 佢話如果檢血指數冇問題係唔會照!!

我想照其實講真係想MAKE SURE個子宮係完全冇問題先放胎, 好辛苦先有2個個雪胎唔想白白浪費!!

不過佢話冇得照, 咁都冇計啦!!

再等多陣就去左抽血, 抽完就走得!

之後我返荃灣買餸, 今晚老爺奶奶黎打邊爐, 老公就返左屋企同D狗狗仲涼!!

去到荃灣見奶奶WHATS APP話想食自助餐於是打左幾個電話問東涌機場附近的店!!

最後BOOK左富豪, 我細妹之前去過話麻麻地!!

不過我地今次去又OK!!

唔理LU有得食食左先!!

DAY11: 假期第二日K5N一樣咁多人, 又係要等45MINS先到我!!

抽完血返左屋企同老公食早餐, 之後2點幾出荃灣會合阿媽細妹去街市買野入黃金海岸BBQ!

是晚BBQ好開心, 燒左好多好味既野!!

DAY12: 第三日返去抽血, 其實隻手每次抽完都會好勊, 我有時諗係唔係真係要抽咁大支先檢到呢!!

返到東涌叫左老公去翠華食早餐, 剛巧我的大肚FRIEND 同佢老公都出黎食早餐, 於是就一齊食!!朋友的BB於9月9日預產期, 時間真係快!! 長假LAST  DAY我地係屋企休養生息!!HAHA!!邊到都冇去!!陪狗狗瞓覺睇電視!

DAY13: 5點9起身, 去到QM7:15, 入院登記處都未開!!

上到K5N坐下時, 竟然碰到舊同事, 其實我之前已知她也排QM, 不過估唔到會同一時間係QM見到!!原來佢做IUI. 今日好早上黎, 唔駛點等就到我抽血!!SO好快走得都冇咩時間同舊同事詳談!!

DAY14:   5點9起身, 去到QM7:20, 係入院登記處就見到舊同事!!

去到K5N姑娘叫我入520, 佢話可以做手術啦!7月5日做, 咁我問今日仲駛唔駛抽血, 佢話唔駛!!

出去等埋舊同事抽血之後一齊走. 舊同事話你今日都唔駛抽血, 佢地都可以早一日下午打比你話你知, 唔駛你咁早又上黎啦!!我話算啦!!佢地好忙, 唔好EXPECT有D咩SERVICE!

之後就同舊同事詳談, 有人傾下, 講真真係好好多!!舊同事我地一齊加油呀!!

可能已經做左1次IUI, 2次IVF, 1次FET, 今次係第2次FET.

心情真係好忐忑, 面對渺茫的希望, 面對失敗的恐懼!!!

真係唔知自己應如何自處!!

依家都係見步行步!!

因為唔踏出依一步, 希望就更加更加渺茫!!!

FET開始?

好耐冇上黎啦!!

之前5月忙master考試, 一考完試第二日又出差, 真係好忙下!!

好在考試都考得唔錯, 我終於可以順利畢業了!!

早二年的其中一個心願完成了!!

現在最想的當然係有小朋友!!(其實一路最想都係有小朋友)!!

等待左4年多!! 走過依4年真的不易!!

忙完考試忙完出差, 我安排左一轉旅行, 比自己relax一下!!

其實都唔relax係行程緊密, 不過都ok好玩!!

當依一切的忙碌都過去, 又係開始FET接我兩個雪寶寶回家的時候!!

不過7月中又有一個2日的廣州出差之旅,對公司都幾緊要, 唔好意思同老細講唔去!

BUT個幾日就會係DAY25-DAY30 左右……真係唔知去唔去好定係下個月先放!!

講真我唔想再推遲……再下個月公司又唔知有咩出差, OR其他野忙!!真係好矛盾!

今日係M黎 DAY1, FET唔FET都要依兩日決定!!

埋白講對於我grade5的雪寶寶, 心底裡是不敢有太大希望, 但總要一試!
明知機會細, 但又要懷著希望一試的心情, 真的很難受!!
因為可以預見的是又會迎來失敗的傷心!!

有時都會問自己仲可以受到幾多次依d打擊, 上天係唔係覺得我好堅強, 所以一直想考驗我!!
其實4年多的考試已經夠了!! 我只想有一個成為媽媽的機會, 有自己的兒女, 但真的這麼難嗎!!

運動大計

其實我地兩公婆都好忙, 除左各自要返工, 又要照顧3隻狗!

我讀緊master, 佢又讀緊MBA, 而且佢有時又要出差!!

我地兩個真係各有各忙!

上次失敗後我係plan緊做多d運動!

點知有晚我老公突然話要陪我做多d運動(其實佢平時係有去踩單車, 運動量係多過我好多)

佢話陪我一星期去跑步兩日!

雖然到依家都未實行到, 不過佢有心我都好開心!!起碼覺得佢係求b路上contribute多了!

唉!其實女人就係咁易滿足!

雖然佢冇陪我跑步, 但我自己就盡量一星期最少跑1次.

同埋最近又行過一次山, 由東涌行去大澳! 剛剛星期日又打過一次羽毛球!!

都係同老公同行!!

希望keep住一星期有二次運動啦!keep好身體!!!