依半年黎真係經常請假請到annual leave都冇晒!跟住唯有遲到早退咁去見醫生!
唔係睇西醫就係睇中醫!我都有d唔好意思!
今年1月做appraisal時我同經理講, 我之後都可能要經常早走去睇醫生, 咁佢都好關心我, 問我冇咩事呀!我就話我要睇婦科, 跟住可能佢為免我唔好意思, 佢就話唔駛講啦!冇問題架啦!!
我都好多謝佢, 雖然佢唔知我真正為咩要成日早走睇醫生, 但佢都唔介意!
有次我同佢講要早走去睇醫生, lunch後佢仲見到我, 就話做咩仲唔走?我話未夠鐘!!遲少少先走!
對於要行我地依條路既人, 得到老細既體諒真係好重要!!
如果第時療程升級, 我都要同經理講清楚我醫緊咩, 因為到時可能真係經常要遲到早退, 而唔係一個月一兩次咁少!
我地要做依d療程又要用好多錢, so又好難辭工!
唯有希望老細都體諒同support我地啦!!
噖日請左半日假去QM證記!
其實噖日下午都係我老公一個朋友既註冊日!我係去左佢地既註冊先再去QM!
其實佢地係無意中有左, 依加都5個月啦!SO就註冊先, 到BB出世後12月先擺酒!
都好”鄧”佢地開心!我老公成日話有冇咁易中呀?!一次就有左, 仲要結婚??依個朋友同佢老婆唔係識左好耐, 如果冇BB都唔會結婚住!
其實我心情都有D怪怪地!一方面都真係真心祝福佢, 同埋好鬼羨慕佢地!而自己參加完人地個婚禮就要去排不育, 感覺真係唔好受!!真係同人唔同命!!
係旺角坐小巴去QM都唔係好耐30分鐘左右啦!
之前都睇過其他sis既BLOG知道係去S座5樓登記.
去到都唔使10幾分鐘就登記左!要等1年半之後先返去見醫生即係11年10月7日!真係等到頸都長!!當然我老公都要返去交2次丁丁!
去到時聽到姑娘話今日落左7個, 全部做晒!!
又有一對年青男女係登記處同姑娘講我想唔要!姑娘話我地下午唔收證WOO…..你要幾時幾時黎先得BABAAAAAAA……….
唉!依個世界就係咁咁容易得到就唔珍惜!難維我地依D……….
其實要等一年半先見醫生, 真係做IVF都最少要等2-3年, 實在係太耐啦!!
我同我老公講左我既PLAN, 先休息3個月, 希望會有好消息!
如果唔得就返鄧醫生到繼續療程(打排卵針), 試4-5個月啦!或者睇鄧醫生再有咩建議!
如果大吉利是真係都唔得, 可能休息1-2個月後去偉澤做IVF.
我老公都好SUPPORT我依個PLAN, 咁我都放心D!
起碼都有多1年時間比我儲下錢!!
另外噖日的起心肝JOIN左YOGA班, 希望做多D運動都健康D同埋增加受孕機會啦!不過依個YOGA中心係新架, 要等到3月中先開!暫時未有得做住, 唯有星期六同老公打羽毛球, KEEP住先啦!哈哈!
噖日去左鄧醫生到覆診, 其實m小姐20/2 已經黎左!!
於是鄧醫生寫左紙叫我去排定QM做兩手準備!
佢話佢舊年12月去開過會黎, 話QM如果30歲前做IVF成功率有65%, 30-35歲成功率有45%比國際水平都高, 但一過35-40成功率就只有25%!SO佢依加全部都會轉介去QM, 而且佢話一排可能要等3年, SO叫我早D排希望如果有須要做都可以係35歲前做!!
另外食排卵藥對我都好似冇咩較用!所以療程要升級, 要自己打排卵針!
不過我同醫生講, 我同C6依半年都已經好勀想休息幾個月順其自然先!
醫生都話OK!BUT叫我KEEP住睇中醫!我自己都係打算繼續睇中醫調理好D先!為打下一場仗作準備!同埋冇期望亦冇失望!希望可以放鬆D心情啦!
其實聽到醫生話要排QM我真係心裡一沉, 一時都未能接受!
唉!從來都冇諗到會咁嚴重!食排卵藥期間醫生都話樣樣條件都好好!所以不能成孕既原因係不明!
原因不明咪即係仲難搞!
不過都冇辦法啦!都係見步行步啦!
上星期四去左睇鄧醫生!係睇之前仲有時間, 就去左排隊買瓜子, 已經係閒日but都要等成20分鐘先入到去買!!臨近新年真係人山人海!!
去到診所都要等成1個鐘先有得睇!!
醫生話我check 輸卵管個報告返左!!係冇問題!
好在冇問題咋!!!
But點解冇問題又咁難有呢!!
食排卵藥都食左4個月, 都冇起色!!真係好疑惑!!
今次係第5次食排卵藥, 今次都照到有1粒卵子成熟, 同上個月一樣, 打破卵針加3支增厚內膜針!!
唯有再繼續努力啦!!
本來我都幾鐘意新年, 可以放下假, 又可以同d親朋好友聚下!!
結婚後第二次過年, 本應幾開心!
但係一諗起d親戚一定問幾時生返個時, 就好灰!!!
因為平時同老爺奶奶d朋友一齊食飯時, 大家已經不斷咁問, 同叫我地快d生返個!
更何況係新年!大家一定問到我口啞啞!!
唉!我夠想快d生返個啦!但係你估咁易咩!!
自己已經有苦自己知!
唉!仲要面對依d無形壓力!!
不過我都會好阿Q咁答人:係呀!!好快就生架啦!!
因為我都真係好想好快就生架啦!!哈哈!!
係到祝各位戰友都可以做到虎媽媽or兔媽媽都ok架!!!!
星期五, 下午同manager講左去做body check, 可以唔使請假!!真係好!!
我差不多早左半個鐘去到旺角個間診療中心!
登記&比左錢$1500後, 等左幾個字就到我啦!
個一刻心情都有少少緊張, but都唔算好利害!
入到去姑娘例牌叫我除晒衫, only著件袍!
跟住瞓係張鐵床上!個一刻我就真係覺得有d驚!
因為張床真係好冰冷, 雖然姑娘話關左冷氣仲比張毛巾我琴!!
但係個感覺就有d好似等待受刑!
之後姑娘同我好仔細咁講左個過程係點!
其實我之前都大概知道, but姑娘話, 當放顯影劑時係會有d痛!
佢話依種痛有d似經痛!
唉!唔理啦!總之快d做完快d走!
點知, 當第一次插條喉入去後, 醫生竟然話個位置唔啱, 要再放過!
真係攞命又要受多次!!
其實講真唔係真係好痛, but始終會令你覺得唔舒服!!
之後兩日都有流少少血絲, 姑娘話係正常woo…….
我照完後有問姑娘知唔知個結果, but佢話醫生要詳仔d睇, 個report會send返比鄧醫生!
唉!咁即係要等到今個星期四先知結果!
照完之後去左旺角中心行左一個圈!跟住就返媽咪到食飯!
因為做依個檢驗都幾勀!!
