其實我地兩公婆都好忙, 除左各自要返工, 又要照顧3隻狗!
我讀緊master, 佢又讀緊MBA, 而且佢有時又要出差!!
我地兩個真係各有各忙!
上次失敗後我係plan緊做多d運動!
點知有晚我老公突然話要陪我做多d運動(其實佢平時係有去踩單車, 運動量係多過我好多)
佢話陪我一星期去跑步兩日!
雖然到依家都未實行到
, 不過佢有心我都好開心!!起碼覺得佢係求b路上contribute多了!
唉!其實女人就係咁易滿足!
雖然佢冇陪我跑步, 但我自己就盡量一星期最少跑1次.
同埋最近又行過一次山, 由東涌行去大澳! 剛剛星期日又打過一次羽毛球!!
都係同老公同行!!
希望keep住一星期有二次運動啦!keep好身體!!!
復活節期間請左3日假, 放左11日, 自制長假期!
本打算如果成功可以養胎, 咁失敗左就唯有用黎療傷!
有睇過我的blog的朋友應該知道我家養左3隻狗!
其實比我阿婆知道我養狗後, 佢已非常反對!
老一輩的舊思想亦無法改變!
唯有她說什麼我都說是, 但當然不會放棄我的3小狗!
其實我爸爸媽媽對3小狗亦沒有好感, 但可能我地兩公婆都咁大個, 佢又唔好意思話我!
復活節期間阿媽打黎問我結果點, 醜婦終須見家翁, 都要話佢知唔得!
阿媽終於又忍唔住叫我唔好養3小狗, 叫我將佢地送比人, 等有左再養過!
話養佢地影響風水, 影響我,生b機會!!
之前同佢解釋過好多次, 醫生話養狗係不影響懷孕, but佢聽唔入耳朵
個刻真係整到我崩潰, 我答左句生唔到算啦!之後收左線!!
收線後淚如泉湧, 老公係咁問我阿媽講左d咩, 我跟本講唔到野!
到我平復左d時, 講比老公聽, 老公叫我唔好理佢講咩!!
其實我地行依條路已經處處受傷, 有時比最親的人刺一刺真係仲傷!
雖然知道阿媽都係想我快d可以生b, 但都係接受唔到依d說話!
有時我覺得生兒育女係一生的承擔, 如果我連3隻小狗的承擔都做唔好!
個天又點會比機會我向我的兒女做一生的承擔呢!!?
經過依次電話事件後, 阿媽冇再提過依件事!
可能佢知我的底線啦! 咁始終係兩母女係冇隔夜仇既!!
