抽卵編

成個星期冇UPDATE啦!

真係唔好意思!!

見到好多BLOG友的鼓勵同支持真係好開心!!

係到再一次多謝你地!!因為有你地既支持我先可以有更大的信念!!

 

DAY12 講返一個星期前依日係做抽卵前一日, 咩針都唔駛打, 本應休息一下, 不過個日就同左奶奶老公去左新屋拜4角!

奶奶係好唔捨得我地搬去咁遠, 不過因為近我阿媽, 佢都無奈接受!

雖然我係有D自私, 對佢可能有D殘忍, 不過都冇辦法我想搬大D又想近我阿媽唯有做此決定!

 

DAY13 一早5點幾就起身, 6點坐的士去QM去到未夠7點, 即刻去急症室辦入院手續, 之後上去K5N, 剛好有個姑娘返左, 個姑娘係咁讚我乖話我好準時, 哈哈!

等左一陣DORIS姑娘幫我打點滴, 其實都OK唔算好痛!

係出面又等左一陣, 有姐姐帶我去病房, 而老公就唔入得去, 佢就去左食早餐同埋等10點左右交野!

我被安排到傳說中的無敵海景床位K5S的10號床, 一早去到其他床位都冇人得我一個, 之後有位阿姐教我點著D手術袍, 著好又係繼續休息, 都係睇下電視. 到左8點幾左右有另一位都係做抽卵既戰友黎左, 當然之後都有傾下計啦!原來佢已經第3次抽卵啦! 不過醫生話佢今次指數高, 多數都唔可以放胎!講下講下姑娘就黎幫我打止痛針, 之後就唔可以落床, 因為個頭真係會開始暈暈地! 可能有人傾下計分散下注意力, 個刻真係唔覺得好緊張, 之後9點3左右蘭子就黎推我去手術室, 蘭子真係好好人, 叫我之後快D請佢食薑醋, 又問我阿媽幾歲, 佢話佢同我阿媽都係差不多大, 所以當我地係女咁! 我覺得佢真係好敬業, 而且亦都比到好多鼓勵我地! 講返抽卵, 我入到去手術室前的WAITING ROOM等左一陣, 前面一位抽左卵既推左出黎, 佢應該係私家症, 聽到柴醫生同佢講有一粒, 當然個位朋友係冇晒表情! 我自己個刻亦開始意識到原來真係會得咁小!!

不過好快已經收捨心情因為接著入手術室的就係我!SET好晒位對埋ID就開始, 其實開始時我好眼訓, 不過之後聽到姑娘講2粒, 2粒, 2粒……突然精神D, 想知道抽多幾多, 於是成個過程其實都係清醒的, 一路抽其實都冇咩感覺, 係做到後尾係有D痛, 不過都可以忍受到, 之後抽完等左一陣醫生話我知有4個好的卵, 個一刻好疑惑, 姑娘明明數左好多, BUT都係得4粒咁少!!!

不過都冇再問之後就推左我返病房休息, 接住就到我隔離床的戰友抽卵!

返到病房都仲係暈暈地, 之後打電話比老公, 佢啱啱坐車離開QM, 自己強忍淚水, 同佢講得4個卵好少, 老公就話好既一個都夠啦! 叫我唔好想太多, 快D休息. 之後打多一個電話比阿媽話佢知抽左4個卵. 其實好想瞓不過聽到醫生講只係得4個卵一直耿耿於懷, 瞓唔到, 一路安慰自己, 不過都瞓唔到!

隔離床的戰友之後都抽完返黎, 佢話佢抽左14個得6個用得, 好既一半都冇, 比佢上兩次做既結果差, 因為七除八扣可能得2-3個胚胎, 個時我仲強忍自己得4個好卵的傷感, 走去安慰佢!!

12點開始派飯, 我個時真係好肚餓, 雖然D餸真係幾難食, 我都將佢食得7788, 除左D肉片實在太難食, 真係食唔到! 因為唔夠飽, 我連個橙都食埋, 哂蘭子見到後話真係睇唔出你個人瘦瘦地都咁食得!!哈哈冇計, 我其實一向都大食!!

不過隔離床的戰友就一食少少即嘔, 佢對D麻醉藥真係好大反應, SO真係好辛苦!!

之後我細妹黎接我, 佢先幫我交錢$150, 同埋去攞藥!

柴醫生黎巡房, 問我個肚有冇痛, 個時仲冷勁話冇痛(點知原來好戲在後頭), 我問左醫生我TOTAL抽左幾多個卵, 原來係TOTAL抽左10個, 得4個OK!

 

細妹攞完藥就同我返阿媽屋企, 我細妹都話已成事實, 叫我都唔好諗咁多!!

返左屋企就真係咩都唔駛做, 咩都係阿媽代勞!

 

晚上瞓覺前打比老公, 個一刻真係忍唔住咸, 因為實在太擔心得4個卵, 七除八扣會唔會得1個OR兩個得, OR 最差會唔會冇!!

老公聽到好好安慰我, 佢話按機率應該都有2個OK, 就算真係冇, 如果我唔怕辛苦咪再黎過啦! 就算真係唔生我地咪好好同我地3隻狗狗一齊生活, 佢話佢自己都係一個好人, 平生冇做咩壞事, 叫我放心, 其實一切都係個天安排, 叫我唔好想太多!

聽到佢既安慰個心真係放底左好多! 唔再想太多啦!

 

今次好快已經瞓著, 不過半夜個肚就痛醒左, 我去左小便之後冇理D痛繼續瞓!

 

DAY14 依日全日係屋企休息, 其實D麻醉藥過左個肚就有D痛!而且仲幾多胃氣!

不過都係可以忍受的!!

奶奶依兩日都有打比我問我情況, 都講左比佢知等佢安心D!!

 

其實真係好多謝老公, 媽咪, 奶奶同埋屋企的其他人既支持, 有佢地既全力支持, 我先可以好好地走到今天!!!